Preguntas frecuentes marcas e nomes comerciais

Poderán constituír marca os seguintes signos ou medios:

• a) As palabras ou combinacións de palabras, incluídas as que serven para identificar as persoas. Por exemplo, "DULCILIA" para distinguir produtos ou servizos, ou "El Juli" como nome artístico.
• b) As imaxes, figuras, símbolos e gráficos, por exemplo, a representación dun cabalo coas patas dianteiras en alto que distingue os coches Ferrari, ou un crocodilo para a roupa de vestir de Lacoste.
• c) As letras, as cifras e as súas combinacións, por exemplo, BBVA, Licor 43 ou S-3.
• d) As formas tridimensionais, entre as que se inclúen os envoltorios, os envases, a forma do produto ou a súa presentación.
• e) Os sons.
• f) Calquera combinación dos signos ou medios que, con carácter enunciativo, se mencionan nas alíneas anteriores.

A Lei establece unha serie de prohibicións:

• Signos que non teñen capacidade abondo para distinguir, por exemplo, un punto ou unha liña sen ningún outro elemento caracterizador, posto que dificilmente serían percibidos como "marca" polo consumidor.
• Signos xenéricos e específicos, por exemplo chocolate para distinguir "chocolate", aqueles que se compoñan exclusivamente de signos que no comercio ou na linguaxe corrente chegaran a constituír unha denominación necesaria ou usual de produto ou servizo do que se trate, por exemplo, "Rollitos de primavera" para distinguir produtos alimenticios.
• Signos descritivos: os que se compoñan exclusivamente de signos ou indicacións que sirvan no comercio para designar a especie, a calidade, a cantidade, o destino, o valor, a procedencia xeográfica, a época de produción do produto ou da prestación do servizo ou outras características dos produtos ou do servizo, por exemplo, "Edición selecta", ou "Fresas de maio".
• Signos enganosos, por exemplo, "Oleoliva" para distinguir todo tipo de aceites e graxas comestibles.
• Signos contrarios á Lei ou á orde pública, por exemplo, calquera marca xenófoba ou sexista.
• Formas que veñan impostas por razóns de orde técnica ou pola natureza dos propios produtos ou que afecten o seu valor intrínseco, por exemplo, a representación dunha antena parabólica para distinguir antenas parabólicas ou a dun limpaparabrisas para limpaparabrisas, ou a representación dun lapiseiro sen ningún elemento de fantasía ou caprichosa.
• Denominacións de orixe, indicacións xeográficas, termos tradicionais de viños ou especialidades tradicionais garantidas que están protexidas por leis que impiden a súa inscrición e nome de variedades vexetais nalgúns casos específicos.
• Determinados signos protexidos legalmente como bandeiras e escudos de Estados, Comunidades Autónomas, etc.

A OEPM dispón dunhas Guías de exame de prohibicións de rexistro na súa páxina web onde se detallan exemplos e casos concretos sobre os criterios seguidos pola Oficina para analizar as prohibicións absolutas e relativas dos signos distintivos.

Preséntase directamente polo interesado ou a través de representante ou axente da Propiedade Industrial unha solicitude ante a Oficina Española de Patentes e Marcas (OEPM) ou nos centros rexionais de información de Propiedade Industrial das CCAA, oficinas de correos (en sobre aberto, por correo certificado e con xustificante de recepción), nas delegacións e subdelegacións de Goberno, áreas de Industria e Enerxía ou por vía telemática, mediante unha solicitude electrónica, á que se accede a través da páxina web da OEPM (www.oepm.es).